Të pandehurit janë një 37-vjeçar me origjinë nga Kosova dhe një 34-vjeçar me shtetësi të dyfishtë zvicerane dhe maqedonase. Të dy banonin në rajonin e Gjenevës dhe janë arrestuar më 1 shtator 2022, pas një periudhe të gjatë hetimesh dhe mbikëqyrjeje. Që nga ajo ditë, ata kanë qenë të privuar nga liria – fillimisht në paraburgim dhe më pas në lirim të kushtëzuar.
Sipas Zyrës së Prokurorit Federal të Zvicrës, burrat akuzohen për mbështetje dhe drejtim të degës zvicerane të një grupi islamist të quajtur “Vëllezërit e Vitisë”, organizatë e cila dyshohet se ka synuar krijimin e një rajoni të vetëqeverisur me bazë ideologjinë e Sheriatit në zonën e Vitisë në Kosovë.
Hetimet kanë zbuluar që mes viteve 2014 dhe 2022, të pandehurit kanë mbledhur dhe kanë transferuar nga Zvicra në Kosovë shuma që vlerësohen nga 64 mijë deri në 77 mijë franga zvicerane. Paratë dyshohet se janë siguruar përmes donacioneve, por edhe në mënyrë të paligjshme – përfshirë mashtrime me sigurimet shoqërore, kërkesa të rreme për subvencione gjatë pandemisë COVID-19 dhe aksidente të inskenuara me automjete.
Sipas prokurorisë, këto fonde janë përdorur për blerje armësh dhe për përpjekje për të korruptuar zyrtarë gjyqësorë në Kosovë. Në vitin 2016, të dyshuarit thuhet se kanë pasur në përdorim një vendstrehim armësh në Kosovë, ndërsa dyshohet se depo të tjera armësh janë ngritur nga grupe të lidhura në rajon. Ata akuzohen gjithashtu për organizim të takimeve në Gjenevë me qëllim rekrutimi dhe indoktrinimi të anëtarëve të rinj.
Përveç akuzave për mbështetje të një organizate terroriste, dy të pandehurit përballen edhe me akuza për pastrim parash, ryshfet ndaj zyrtarëve të huaj, falsifikim dokumentesh dhe mashtrim. Njëri prej tyre akuzohet edhe për përfitim të paligjshëm të ndihmës sociale.
Gjykimi pritet të zgjasë dy ditë dhe do të zhvillohet para Dhomës Penale të Gjykatës Federale Penale.
Rasti vijon të tërheqë vëmendjen e publikut, për shkak të tentativave të dyshuara për krijimin e një strukture radikale në Kosovë dhe shfrytëzimit të sistemit social zviceran për financim të aktiviteteve ekstremiste.
