Rreth 70 automjete ushtarake dhe mbi 350 trupa të regjimentit “Scots Guards” kanë mbërritur në kampin Bondsteel, duke shënuar përfundimin e dislokimit të tyre të përkohshëm.
Ky kontingjent do të marrë pjesë në një sërë aktivitetesh stërvitore, së bashku me pjesëtarë të tjerë të KFOR-it. Sipas njoftimit nga NATO, këto stërvitje janë pjesë e trajnimeve të rregullta që kanë për qëllim rritjen e aftësisë së KFOR-it për t’iu përgjigjur shpejt dhe në mënyrë efektive çdo zhvillimi të mundshëm të sigurisë.
Prania e këtyre forcave vjen në kuadër të mandatit të KFOR-it, që synon të garantojë një mjedis të sigurt dhe të qetë për të gjitha komunitetet në Kosovë, si dhe të sigurojë lirinë e lëvizjes. Operacionet do të kryhen në bashkërendim të ngushtë me Policinë e Kosovës dhe misionin e EULEX-it.
Pas përfundimit të stërvitjeve të planifikuara, trupat e “Scots Guards” do të kthehen në bazën e tyre në Mbretërinë e Bashkuar.
