Agjencia e Statistikave të Kosovës (ASK) ka publikuar të dhënat për statistikat e hotelerisë për muajin qershor 2025, duke treguar një rritje të dukshme të numrit të vizitorëve krahasuar me të njëjtën periudhë të vitit të kaluar.
Sipas raportit, në qershor 2025 në hotelet e vendit kanë qëndruar gjithsej 63 502 vizitorë, nga të cilët 37,7% ishin vendorë dhe 62,3% ishin të huaj. Ky numër paraqet një rritje prej 12,8% në krahasim me qershorin 2024, kur u regjistruan 56 274 vizitorë.
Numri i net-qëndrimeve arriti në 138 941, me 45,3% të realizuara nga vizitorët vendorë dhe 54,6% nga të huajt.
Vizitorët vendorë sipas rajoneve
Rajoni i Pejës ka pritur numrin më të madh të vizitorëve vendorë – 7 616 persona, me gjithsej 27 215 net-qëndrime. Rritje të ndjeshme të vizitorëve vendorë kanë shënuar Prishtina (+149,7%) dhe Prizreni (+19,4%), ndërsa rënie është vërejtur në Mitrovicë (-24,4%) dhe Ferizaj (-8,4%).
Vizitorët e huaj sipas vendeve të origjinës
Në qershor 2025 janë regjistruar 39 555 vizitorë të huaj, një rritje prej 9,2% krahasuar me vitin e kaluar. Shtetet që prinë për nga numri i vizitorëve ishin Shqipëria (6 753), Gjermania (4 364), Zvicra (3 059) dhe Turqia (2 917). Megjithatë, disa prej tyre kanë shënuar rënie, si Shqipëria (-5,3%) dhe Turqia (-14,8%), ndërsa Gjermania dhe Zvicra kanë shënuar rritje.
