Policia e Kosovës njofton se të gjithë personat e monitoruar janë meshkuj dhe të përfshirë në raste të “dhunës në familje”. Gjatë këtij periudhe, reagimi i policisë në rastet e shkeljeve ka qenë i menjëhershëm dhe ka vepruar në përputhje me Kodin Penal të Republikës së Kosovës. Për momentin, rajoni i Prishtinës ka më së shumti persona nën këtë lloj monitorimi.
Ish-eprori i policisë, Refki Morina, e mirëpriti përdorimin e byzylykëve elektronikë, duke theksuar efektet pozitive në uljen e rasteve të dhunës në familje. Ai shpjegon se pajisjet veprojnë në bazë të GPS-it, dhe personeli i trajnuar reagon në rastet kur sulmuesi afrohet te viktima. “Është i suksesshëm, por profesionalizmi rritet gradualisht me praktikën e vazhdueshme të pjesëtarëve të policisë, sidomos të departamentit për dhunë në familje”, tha Morina.
Edhe Rrjeti i Grave i Kosovës (RrGK) e ka mirëpritur këtë hap, duke theksuar se monitorimi elektronik i personave të dyshuar është një lajm i mirë. Sipas Besarta Breznicës nga RrGK-ja, ende ka shumë raste të dhunës në familje ku gjykatat nuk vendosin byzylykë për mbikëqyrje më të mirë të urdhrave mbrojtës. Ajo përmendi rastet e Diana Kastratit dhe Hamide Magashit si shembuj tragjikë që tregojnë nevojën për vendosjen e këtyre pajisjeve.
Këtë javë në Kosovë është bërë edhe hapja e fushatës “16 ditët e aktivizmit kundër dhunës me bazë gjinore”, duke i dhënë fokus vazhdimit të përpjekjeve për mbrojtjen e viktimave të dhunës në familje.
