Vetëm në gjashtë muajt e fundit, shtatë persona kanë humbur jetën nga dhuna me armë, ndërkohë që autoritetet kanë sekuestruar afro 850 armë. Ekspertët e sigurisë paralajmërojnë për një situatë në përkeqësim dhe bëjnë thirrje për veprime të menjëhershme.
Të dhënat e Policisë së Kosovës flasin vetë. Përveç shtatë viktimave në gjysmën e parë të vitit, shifra e vrasjeve vijon të rritet, me një javë të vetme në gusht që mori jetën e katër personave, tre prej tyre në Gjilan. Kjo situatë ka shkaktuar alarm, duke nxjerrë në pah një trend shqetësues të rritjes së brutalitetit në krimet me armë.
Njohësit e fushës së sigurisë, si Drizan Shala dhe Bedri Elezi, në një prononcim për televizionin publik janë unanimë në vlerësimin e tyre: siguria publike po cenohet seriozisht dhe urgjentisht duhet të ndërhyhet.
Shitet iPhone 13 Pro Max Suharekë, Kosovë
“Kemi rritje konstante të rasteve, por këtë vit është shtuar brutaliteti në këto raste,” tha Shala. Kjo shfaqje e dhunës së skajshme sugjeron se konfliktek po zgjidhen gjithnjë e më shpesh me armë, duke treguar një mungesë besimi te institucionet e drejtësisë.
Elezi, nga ana e tij, thekson një fenomen tjetër të rrezikshëm: “Jemi dëshmitarë që qytetarët e Kosovës po rrëshqasin drejt një forme vetëgjyqësie.” Kur besimi te shteti dobësohet, njerëzit marrin vetë ligjin në duart e tyre, duke rrezikuar jo vetëm jetën e tyre, por edhe të të tjerëve.
Për të ndalur këtë valë dhune, ekspertët kërkojnë ndërhyrje radikale. Elezi është i qartë: Kosova ka nevojë për një reformë serioze në organet e drejtësisë dhe të sigurisë. Pa një sistem të fortë, efikas dhe të besueshëm, shifra e viktimave do të vazhdojë të rritet.
Nëse organet kompetente nuk ndërmarrin masa konkrete dhe të shpejta, rreziku i një përkeqësimi të mëtejshëm të situatës është i pashmangshëm. Kjo krizë sigurie nuk është vetëm një problem statistikor, por një kërcënim real për qytetarët e Kosovës.
