Ngjarja e parë u zbulua në orët e para të mëngjesit në Zveçan. Një burrë, i identifikuar si D.F., 77-vjeç, është gjetur i varur në rrethojat metalike të shtëpisë së tij në rrugën “Mbreti Petar”. Policia e Kosovës ka dalë menjëherë në vendin e ngjarjes dhe ka nisur hetimet për vdekje të dyshimtë. Trupi i pajetë është dërguar për obduksion për të përcaktuar shkakun e saktë të vdekjes.
Një tjetër rast i rëndë u shënua paradite në Skenderaj. Rreth orës 10:00, policia u njoftua se në një zonë pyjore pranë fushës së sportit në fshatin Prekaz i Poshtëm, ishte gjetur një person i varur. Patrulla policore konfirmoi rastin rreth 20 minuta më vonë. Viktima, një burrë rreth 65 vjeç, u gjet pa shenja jete. Identiteti i tij ende nuk është konfirmuar zyrtarisht, dhe njësitë hetimore po punojnë në vendngjarje.
Rasti i tretë ndodhi në Obiliq, ku rreth orës 10:04, policia u lajmërua se në rrugën “Hasan Prishtina” ishte gjetur një burrë i varur. Viktima, e cila dyshohet të jetë rreth 45-50 vjeç, u gjet pranë shtëpisë së tij. Mjeku i QKMF-së konstatoi vdekjen e tij në vend. Hetuesia po punon për të zbardhur rrethanat e plota të kësaj tragjedie.
Të tre rastet po hetohen nga autoritetet përkatëse dhe pritet që rezultatet e hetimeve të hedhin dritë mbi rrethanat e këtyre vdekjeve të dyshimta.
