Në klip shfaqet një skuter elektrik i konfiskuar, i cili gjatë testimit në pajisje matëse arrin shpejtësinë 109 km/orë – më shumë se pesëfishin e shpejtësisë së lejuar për këtë lloj mjeti në Zvicër.
Sipas autoriteteve, drejtuesi i skuterit kishte tentuar të ikë nga policia, por mjeti i tij u kap dhe u sekuestrua. Skuterët elektrikë në Zvicër lejohen të qarkullojnë në rrugë vetëm nëse kanë një shpejtësi të kufizuar deri në 20 km/orë. Çdo pajisje që tejkalon këtë limit konsiderohet e rrezikshme dhe e paligjshme për përdorim në trafik.
Videoja, e postuar në Instagram nga policia më të mërkurën, është bërë menjëherë virale. Brenda 24 orëve, klipi kishte arritur mbi 10 milionë shikime dhe mijëra komente nga përdorues në mbarë botën. Shumë njerëz u shprehën të habitur nga shpejtësia e skuterit, ndërsa të tjerë vlerësuan qasjen e policisë për të ndërgjegjësuar publikun mbi rreziqet e pajisjeve të modifikuara.
Fatura Planet Prishtinë, Kosovë
Policia theksoi se përdorimi i mjeteve elektrike të tejzmadhuara përbën rrezik të madh për drejtuesit dhe qytetarët, duke rikujtuar se shpejtësitë e tilla, në rrugë urbane, mund të rezultojnë në aksidente serioze.
Me këtë postim, autoritetet zvicerane synojnë të parandalojnë përdorimin e skuterëve të modifikuar dhe të nxisin respektimin e rregullave të qarkullimit. Videoja vijon të shpërndahet gjerësisht, duke ndezur diskutime për sigurinë rrugore dhe rregullimin e mjeteve elektrike që po bëhen çdo ditë e më të zakonshme nëpër qytete.
